ಚೌಪದಿ - 181

ನೋವು ನಲಿವುಗಳೆರಡು ಸಮನಾಗಿ ಸಂಚರಿಸೆ| 

ಹಾವಭಾವಗಳೆರಡು ಕೂಡುವುದು ಮನದಿ|| 

ನೋವು ನಲಿವುಗಳೆರಡು ಬಾಳಿನಲಿ ಎಂದೆಂದು| 

ಬೇವು ಮಾವುಗಳಂತೆ - ಅನಿಕೇತನ|| 181 || 

ಚೌಪದಿ - 157

ಮೂಲೆಯಲಿ ಕೂರದೆಯೆ ಸಾಧಿಸುವ ಜನರನ್ನು। 

ಕಾಲವೇ ಕಾಯುವುದು ಚಿರಕಾಲ ಹರಸಿ॥ 

ಸಾಲವನು ಕೊಡದೆಯೇ ಲೆಕ್ಕವನು ತೀರಿಸುವ। 

ಕಾಲಕ್ಕೆ ನಾ ಮಣಿವೆ - ಅನಿಕೇತನ॥ 157 ॥ 

ಚೌಪದಿ - 156

ಓಲೆಯನು ಬರೆದಿಟ್ಟು ನೆಮ್ಮದಿಯಲುಸಿರಾಡು। 

ಮೂಲವನು ಹುಡುಕುತ್ತ ಕಳೆಯದಿರು ಕಾಲ॥ 

ಹೋಲಿಕೆಯ ಮಾಡದೆಯೆ ಬದುಕನ್ನು ತೋರಿಸುವ। 

ಕಾಲಕ್ಕೆ ನಮಿಸಯ್ಯ - ಅನಿಕೇತನ॥ 156 ॥ 

ಚೌಪದಿ - 107

ಹೆಕ್ಕಿಹೆನು ನೆನಪುಗಳನೊಂದೊಂದೆ ನಾನಿಂದು। 

ರೆಕ್ಕೆಯನು ಬಿಚ್ಚುತ್ತ ಹಾರುತಿರೆ ಮನವು॥ 

ದಿಕ್ಕುತಪ್ಪದೆ ಸಾಗಿಹೆನು ನೆನೆದು ಹಳೆಯದನು। 

ಉಕ್ಕುತಿರಲುನ್ಮಾದವನಿಕೇತನ॥ 107 ॥