ಅನಿಕೇತನ

Friday, June 23, 2023

ರೇಗಿಸುವ ತಮ್ಮನನೆ ಮಗನೆಂದು ತಿಳಿದಿರಲು|
ತ್ಯಾಗವನೆ ಮಾಡಿಹಳು ಜೀವನವ ತೇಯ್ದು||
ಯಾಗವನೆ ಮಾಡಿರಲು ತಮ್ಮನಾ ಏಳಿಗೆಗೆ|
ಸಾಗಿಹಳು ಮಗನೊಡನೆ - ಅನಿಕೇತನ|| 184 ||

ಎತ್ತೆತ್ತ ನೋಡಿದರು ಚಿಗುರೆಲೆಯು ಕಂಡಿಹುದು| ಮತ್ತೊಮ್ಮೆ ಬಂದಿರಲು ಹೊಸತೊಂದು ವರ್ಷ|| ಅತ್ತಿತ್ತ ಚೆಲ್ಲಿರಲು ನಗೆಯನ್ನು ಸಂತಸದಿ| ಬಿತ್ತಿಹುದು ಹೊಂಗನಸನನಿಕೇತನ|| 183 ||

ಯೋಗದಾ ಪರಿಚಯವ ಮಾಡಿಹರು ಗುರುವರ್ಯ|

ಯೋಗವೇ ಜೀವನದ ಸಾರವೆಂದಿಹರು||

ಯೋಗವನೆ ಮಾಡುತ್ತ ಸಂಯಮದಿ ನಡೆದಿಹರು|

ಯೋಗ ಧನ್ವಂತರಿಯು - ಅನಿಕೇತನ|| 182 ||

ನೋವು ನಲಿವುಗಳೆರಡು ಸಮನಾಗಿ ಸಂಚರಿಸೆ|

ಹಾವಭಾವಗಳೆರಡು ಕೂಡುವುದು ಮನದಿ||

ನೋವು ನಲಿವುಗಳೆರಡು ಬಾಳಿನಲಿ ಎಂದೆಂದು|

ಬೇವು ಮಾವುಗಳಂತೆ - ಅನಿಕೇತನ|| 181 ||

ಬರೆದಿರುವೆ ಚೌಪದಿಯ ಮತ್ತೊಮ್ಮೆ ನಾನಿಂದು।

ಮರೆಯದೆಯೆ ನೆನೆದಿಹೆನು ಗುರುಗಳಾ ಕೃಪೆಯ॥

ಬರೆಯುತಿರೆ ಸುಖವಿಹುದು ಮನದಲ್ಲಿ ದಿನದಿನವು।

ಮರೆಯದೇ ಬರೆಯುವೆನು - ಅನಿಕೇತನ॥ 180 ॥